Espartaco en Quin.tv

(...) O Eu son Anxo Quintana é unha adaptación simpática, cándida, dun dos intres máis emotivos do cinema épico, o Espartaco de Stanley Kubrick (1960), baseado na extraordinaria obra de Fast, con guión do macanudo Dalton Trumbo (...)
Alomenos isto é o que di Manuel Rivas neste artigo que publica hoxe a edición galega de El País, a propósito deste curioso vídeo que podemos atopar no videoblog do líder do BNG Anxo Quintana.
Unha curiosidade.

Novidades en novela histórica

Dende hai xa varios anos, os meus alumnos de 1º de Bacharelato de latín teñen que ler "obrigatoriamente" unha novela histórica, a escoller entre os exemplares que temos na biblioteca.

Alí poden encontrar varios episiodios das aventuras de Marco Didio Flaco (Lindsay Davis) ou Gordiano el sabueso (Steven Saylor), pasando pola Pompeya de Robert Harris ou Maja Lundgren, o Aníbal de Haefs, Espartaco de Howard Fast, e moitos outros.
O ano pasado empezaron a publicar entradas no blog viam stratam, onde facían unha pequena reseña das súas lecturas.
Onte saíu publicado no suplemento Babelia de El País, unha reportaxe sobre tres novas novelas ambientadas na época romana: Centurión de Simon Scarrow, El águila de la Novena Legión de Rosemary Sutcliff e César, las cenizas de la República, de Gisbert Haefs, que espero poder engadir pronto ás existencias da biblioteca do MGB (con permiso do noso secretario, claro...). Aquí a tedes para descargar en documento *.pdf.

Tamén podedes baixar esta completa recopilación de novela histórica ambientada na antiga Roma, realizada pola Biblioteca de Navarra.

Exposición "A Vía da Prata" en Santiago

O vindeiro mércores 21 de xaneiro, os alumnos "latinos" e "musicais" do MGB, tras asisitir a un concerto didáctico da Real Filharmonía de Galicia (Haydn, Sinfonía nº 82 en Do maior “O oso”) no Auditorio de Galicia visitaremos a exposición "A Vía da Prata: unha calzada e mil camiños", que dende o 11 de decembro e ata o 25 de xaneiro ocupa as dependencias do Museo do Pobo Galego en Santiago de Compostela.

Alí ampliaremos os nosos coñecementos sobre o sistema viario romano, as técnicas de construción e financiamento, a calzada como eixo fundamental nas comunicacións, o itinerario da via da Prata e outras vías que a continuaban, a súa orixe e historia posterior .
Paisaxes, historia, cultura, economía, camiño. Unha boa oportunidade de ver pezas orixinais, miliarios, fotografías e montaxes audiovisuais sobre estas "mil caras" desta rota única.


Podedes descargar a guía da exposición en formato *.pdf.

De wiki con Eutropio en PaulatimGallaecia

Esta semana estamos de wiki nas aulas de latín de 2º de Bacharelato do MGB.

Cando empezaba a explicar o tema das formas nominais do verbo, participios e infinitivos, foi cando se me ocurriu.
A idea sería unha vez máis ir do particular ao xeral, da práctica á teoría. Non perderse na gramática. Elixir, atopar os nosos propios exemplos. Encaixar as pezas, traballar en grupo, axudarnos uns a outros como clase. Un proxecto común. Unha ferramenta 2.0.
Así que pouco a pouco, paulatim, fun poñendo aos meus alumnos a traballar na wiki PaulatimGallaecia.
Este é o plan de traballo:

Traballando con Eutropio

---

Nesta sección faremos unha recopilación de extractos do texto dese autor, clasificándoos segundo o esquema proposto, e ilustrando así os apuntes da gramática latina.

Eutropio

• Ablativos absolutos
• Oracións de infinitivo
• Expresións de lugar
• Expresións de tempo
• Cum histórico
• Subor. adxectivas
• Sub. Adv. Tempor.
  
• Sub. Adv. finais
• Sub. Adv. consecut.
• Participio de presente
• Participio de perfecto

Propónse que sexan os propios alumnos os que colaboren nesta sección.
Utiliza o seguinte formato:

• negriña para o texto latino
• paréntese para ubicar o texto no libro e capítulo
• cursiva para a tradución ao galego

Exemplo:
Dimissis exercitibus (Liber VI, 19). Licenciado o seu exército, despois de licenciar ao seu exército.

• Usa o símbolo (...) para indicar a elisión de parte do texto:

Exemplo:
Rediens ex Gallia victor (...). (Liber VI, 19). No seu regreso dende a Galia coma vencedor / regresando vencedor dende a Galia (...)

¿Alguén máis se anima a participar? Podedes seguir o xa empezado cos vosos alumnos.
Nós estamos fundamentalmente co libro VI.
Recordade que facilita moito a labor de control e coordinación o feito de rexistrarse (Join in) en wikispaces antes de empezar a traballar. É gratuíto e faise nun minuto.

Paulatim, paseniño.