Composición culta e derivación grega e latina (II)

Hai un mes aproximadamente (tempus fugit irreparabile...) publiquei unha entrada onde daba a coñecer unha actividade de composición culta e derivación de orixe grega e latina.

Pois ben, unha vez testada na aula (os meus alumnos de 4º foron os encargados de probala a fondo...), publico esta nova versión 1.2, que inclúe moitas melloras e corrixe algúns erros detectados.

• inclúe os termos gregos no seu propio alfabeto (xentileza de Ana Ovando)
• corrixe erros nas táboas anteriores
• engade termos novos e suprime algúns demasiado difíciles para os alumnos
• inclúe bibliografía

E o mellor de todo. Podedes descargar dous bancos de preguntas moi completos para os vosos cursos de moodle. Están en formato Moodle XML. Só tedes que descargar co botón dereito do rato os bancos de preguntas incluídos máis abaixo, crear un cuestionario no voso Curso, e logo, na pestana "preguntas", picade en "importar". Por arte de maxia teredes case 200 preguntas listas para ser incluídas no voso exame (todas elas comprobadas na aula).

• Descargar banco de preguntas de etimoloxía de orixe grega
• Descargar banco de preguntas de etimoloxía de orixe latina

pd: Tedes outras actividades moi interesantes dispoñibles na WiChiron, a wiki de recursos de Chiron.

Composición Culta e Derivación de orixe grega e latina

compo_deriva_grega_latina_alumno_def_1_2

Este é o título desta actividade que preparei pensando nos meus alumnos de latín de 4º de ESO, aínda que o resultado final penso que ben pode aproveitar tamén aos de 2º de Bacharelato, sendo como é obxecto dunha das preguntas optativas do exame de selectividade.
É un documento de 19 páxinas, onde, logo dunha moi breve introdución á estrutura básica da palabra e á formación das mesmas, dase paso a unha táboa de composición erudita de orixe grega no primeiro elemento.
Temos unha serie de étimos e o seus significados desordeados. O alumno terá que construír unha nova táboa co étimo grego, o seu significado e aportar exemplos.
Sigue outra actividade idéntica, pero agora co étimo grego no 2º elemento da palabra, e outra máis con prefixos de orixe grega.
Logo vén o composición erudita de orixe latina, de 1º e 2º elemento, onde o alumno terá que seguir construíndo novas táboas, ademais de buscar o significado dos étimos latinos (os dos étimos gregos xa figuraban, aínda que desordeados, pero agora terán que empregar o diccionario).
Por último, dúas actividades un pouco máis difíciles. O alumno terá que completar dúas táboas de prefixos e sufixos latinos, ordeando os significados destes últimos é buscando exemplos de cada acepción léxica.
En resumo, 7 actividades que poden ocupar outras tantas clases, se deixamos aos alumnos que sexan protagonistas activos na busca das solucións.
Ao final do documento engadín a licenza creative Commons que utilizo tamén neste mesmo blog.
Todos os meus materiais están na rede, a disposición de todo o que queira utilizalos. O único que pido é o seguinte:

• que se algúen os utiliza, me cite como autor
• que non se faga uso comercial do mesmos
• e que se se comparte ou transforma, se faga con esta mesma licenza

pd: se alguén de fóra da Gallaecia está interesado nesta actividade e quere traducir o documento a outras linguas para utilizalo nas súas clases, que se poña en contacto comigo ou deixe un comentario. Podedes encontrar esta e outras actividades interesantes na WiChiron, a wiki de recursos de Chiron.

Derivación e composición latina. Tópicos horacianos.

Quedan xa moi poucos días de curso para os alumnos de 2º de bacharelato e imos rematar este ano traballando os procedementos de formación de palabras en latín, a derivación e a composición, e a súa pegada na evolución ás linguas romances, xa que é esta unha das preguntas de "cultura clásica" que van caer no exame da Selectividade 2007, aínda que con escaso valor, só 0,75 na nota final (e ademais é a elixir entre catro, unha de latinismos, outra da Romanización da Gallaecia e unha máis de toponimia)

Para iso elaborei un documento onde se recollen os principais prefixos e sufixos, tanto na súa forma latina como a evolución ao galego e castelán, acompañados de exemplos e significados de cada un. Tamén se inclúen os elementos léxicos máis habituais que interveñen na composición erudita.

E xa que estamos cos temas das PAAU, entre os que se conta A Lírica e Horacio, na nosa aula falamos sobre todo dos tópicos literarios horacianos e a súa influencia na literatura posterior, con especial mención na literatura galega, basándome nun traballo anterior do noso pater Carlos Cabanillas.